BSU-da Gənclər Gününə həsr olunan tədbir keçirilib

Fevralın 2-də Bakı Slavyan Universitetində (BSU) Gəncləri Gününə həsr olunmuş tədbir keçirilib.

Öncə Azərbaycan Respublikasının Dövlət Himni səsləndirilib və Şəhidlərimizin əziz xatirəsi bir dəqiqəlik sükutla yad edilib.

BSU-nun rektoru Anar Nağıyev universitetin gənc kollektivini, tələbə və magistrantları Azərbaycan Gəncləri Günü münasibətilə təbrik edərək bu tarixi günün təsis edilməsinin Ümummilli lider Heydər Əliyevin adı ilə bağlı olduğunu, 1997-ci ildən etibarən 2 fevral tarixinin Azərbaycan Gəncləri Günü elan edildiyini deyib. Müstəqil Azərbaycanın dövlətçiliyinin gücləndirilməsi gənc kadrların hazırlanmasından, onların intellektual inkişafından və cəmiyyətin aparıcı üzvlərinə çevrilməsindən bəhs edən rektor hazırda gənclər üçün yaradılan imkanları nəzərə çatdırıb. O, gənclərlə iş prosesinin intensiv xarakter aldığını, bu sahədə zəngin qanunvericilik bazası və gənclər siyasətini həyata keçirən dövlət orqanları yaradıldığını vurğulayıb. Rektor bildirib ki, dövlət gənclər siyasəti hazırda Prezident cənab İlham Əliyevin diqqət və qayğısı ilə yeni inkişaf mərhələsini yaşayır, bunun nəticəsidir ki, bugünkü Azərbaycan gəncliyi cəmiyyətin həyatının bütün istiqamətlərində fəal iştirak edir, yüksək intellektli toplum kimi yetişir, beynəlxalq miqyaslı yarış və tədbirlərdə ölkəmizi layiqincə təmsil edir. A.Nağıyev Müzəffər Ali Baş Komandan İlham Əliyevin rəhbərliyi ilə torpaqlarımızın işğalçı təcavüzündən azad edilməsində gəncliyin müstəsna xidmətləri olduğunu deyib. Ölkəmizin şərəf tarixində izini qoymuş şəhid məzunlarını diqqətə çatdıran Rektor BSU-nun tələbə və məzunlarının istər informasiya müharibəsi, istərsə də arxa cəbhədə öz töhfəsini verdiyini də diqqətə çatdırıb.
A. Nağıyev BSU - nun “Heydər Əliyev adına təqaüd”-ə layiq görülən tələbələrinin uğurları münasibəti ilə təbrik edib və uğurlarının davamlı olmasını diləyib. Rektor gəncləri aktiv fəaliyyətə, şəxsi perspektivləri inkişaf etdirməyə, intellektual səviyyələrinin artırmağa və gənclərə istər ölkədə, istərsə də xaricdə yaradılan təhsil imkanlarından faydalanmağa çağırıb. Rektor bugünkü günün mahiyyəti və gənclər üçün yaradılan imkanları məhz onların dilindən eşitməyin əhəmiyyətini vurğulayaraq çıxış üçün sözü gənclərə verib.

Tələbə Gənclər Təşkilatının sədri Nuray Orucova, Həmkarlar İttifaqı Komitəsinin sədri Əli İsmayılov, Tələbə Gənclər Təşkilatı İctimaiyyətlə iş üzrə müavin Elxan Verdiyev çıxış edib.
Sonra Azərbaycan Gəncləri Gününün tarixi ilə bağlı videoçarx nümayiş etdirilib.
Sonda isə aktiv tələbələr sertifkatlarla təltif olunublar.