BSU-da Formula 1 Azərbaycan Qran Prisinin təqdimatı keçirilib
Dekabrın 23-də Bakı Slavyan Universitetində (BSU) Formula 1 Azərbaycan Qran Prisinin təqdimatı keçirilib. Təhsil Nazirliyinin (TN) "Bir” Tələbə-Könüllü Proqramının təşkilatçılığı ilə baş tutan tədbirdə tərbiyə işləri üzrə prorektor, f.ü.f.d Xanım Sultanova BSU tələblərinin beynəlxalq və ölkədaxili tədbirlərdə fəal iştirakından danışıb. Tələblərin könüllülük fəaliyyətini yüksək qiymətləndirən X.Sultanova onlara uğurlar arzulayıb.
Təhsil Nazirliyinin "Bir” Tələbə-Könüllü Proqramının meneceri Tural Abdullazadə və Bakı Şəhər Halqası Əməliyyat Şirkətinin İnsan resursları və İşçi qüvvəsi şöbəsinin koordinatoru Tural Hümbətov 2017-ci ildə 23-25 iyunda ölkəmizdə ikinci dəfə keçiriləcək Azərbaycan Qran Prisi haqqında iştirakçılara ətraflı məlumat veriblər. Çıxışçılar Azərbaycan Qran Prisinin "Könüllülər” proqramına qoşulma prosesi və namizədlərə aid olan tələblər, könüllülərin iş sahələri barədə danışıblar.
Sonra Bakı Şəhər Halqası Əməliyyat şirkətində yeni açılmış akademiya və akademiyada keçiriləcək təlim proqramlarına dair slayd nümayiş olunub, videoçarx izlənilib.
Tədbirin davamında gənclərin Formula 1 haqqında məlumatlılığını öyrənmək məqsədilə yarış keçirilib, qalib gələn tələbələrə hədiyyələr təqdim olunub.
Sonda Formula 1 Könüllülük Proqramı haqqında ətraflı məlumatları əks etdirən bukletlər paylanılıb.
BSU-nun Mətbuat xidməti
1654501810.png)