BSU-nun rektoru MAPRYAL-ın Rəyasət Heyətinin üzvü seçilib
Məlum olduğu kimi, bu il 29 aprel – 3 may tarixlərində Qazaxıstan Respublikasının paytaxtı Nur-Sultan şəhərində Rus Dili və Ədəbiyyatı Müəllimləri Beynəlxalq Assosiyasiyasının (MAPRYAL) XIV Konqresi və Baş Assambleyası keçirilib. Konqresdə Bakı Slavyan Universitetini (BSU) tədris işləri üzrə prorektor, professor Telman Cəfərov, elmi işlər üzrə prorektor, professor Rafiq Novruzov, Ədəbiyyat nəzəriyyəsi və dünya ədəbiyyatı kafedrasının professoru Rəhilə Quliyeva təmsil ediblər.
Son üç ildə davamlı olaraq respublikada rus dilinin tədrisinə, rusdilli təhsilə, Rusiya–Azərbaycan əlaqələrinin inkişafına və qorunmasına verdiyi töhfələr nəzərə alınaraq BSU rektoru, professor Nurlana Əliyeva MAPRYAL prezidenti, milli assosiyasiyaların rəhbərləri, tanınmış elm və təhsil xadimləri tərəfindən MAPRYAL Rəyasət Heyətinə üzvlüyə namizəd irəli sürmüş və səs çoxluğu ilə qəbul edilmişdir. Gizli səsvermə nəticəsində XV konqresin Sankt-Peterburqda keçirilməsi qərara alınıb.